Daspö l’an 2003 mettan ils set commembers da Puntraschigna cultura insembel ün program annuel biling pels abitants da Puntraschigna. Litteratura, musica, teater, art, art pitschna, poesia, film, fotografia, istorgia, natüra, lingua, üsaunzas, culinarica ed occurrenzas da cumpagnia reflectan la spüerta culturela multifaria per giuven e vegl. Las occurrenzas vegnan visitedas dad indigens e giasts e glieud da la regiun, que chi demuossa, cha la cultura in tuot sias fatschettas es dvanteda adüna dapü üna part fixa da la vita cumünela. Tar las occurrenzas cun bger success e chi’s repetan adüna darcho appartegnan la triennale Vias d’art, ils concerts d’iffaunts Rambazamba, la festa da maruns, la saireda culturela, sairedas cun art pitschna cun p. ex. Flurin Caviezel, Franz Hohler, Jörg Kienberger, il gianter cumünaivel da Chalandamarz, art e misteraunza ubain ils concerts grandius dal cantautore Pippo Pollina.
Innumbrablas occurrenazas grandiusas mainan pü dastrusch ils differents aspets da la cultura
La spüerta culturela da Puntraschigna a’s dess pertschaiver eir our d’cumün
Daspera haun lö innumbrablas occurrenazas grandiusas, chi mainan pü dastrusch als interessents da cultura ils differents aspets da la cultura. Ellas miran sülla intermediaziun da las valuors culturelas vers inaint, purtand nouvs impuls, ed ellas rendan consciaint e sustegnan las valuors da la lavur culturela tradiziunela ed innovativa da la vschinauncha. La lavur da Puntraschigna cultura dess eir mner ad ün rinforz da l’identited culturela dals abitants da nossa vschinauncha. La vschinauncha promouva cotres l’immaint per noss’istorgia e nossa lingua, per nos preschaint e nos avegnir. Ella amegldrescha però eir l'intermediaziun da valuors culturelas vers inour. La spüerta culturela da Puntraschigna a’s dess pertschaiver eir our d’cumün ed ella dess procurer per ün purtret d’üna vita culturela multifaria e valurusa.
- Las occurrenzas actuelas
- Download program annuel actuel pdf