Puntraschigna Cultura
Lingua ed üsaunzas

Puntraschigna cultura promouva l’immaint per la lingua rumauntscha

Puntraschigna cultura promouva l’immaint per la lingua rumauntscha, las üsaunzas e las tradiziuns illa vschinauncha bilingua e chüra l’intermediaziun da s-chazis culturels. Tres üna cumparsa  consequaintamaing plurilingua da Puntraschigna cultura a reguard stampa e tar occurrenzas, dess quist intent fat gnir consciaint e gnir chüro. La publicaziun d’üna cronica digitela dal cumün füss a lungia vista giavüschabla. Ella dess focusser e sgürer tuot ils s-chazis culturels. La cumischiun sustegna auncha üsaunzas vividas scu il Chalandamarz u la Schlitteda, s’ingascha però eir per la reanimaziun dad üsaunzas veglias scu il rudler övs u la festa da maruns. Tar las activiteds tuochan eir cuors scu per exaimpel trats engiadinais, veglias tecnicas da misteraunza scu eir tevlas d’infurmaziun, la visibilited da la bilinguited illa vita publica, visitas scu per exaimpel aint il Archiv culturel Engiadin’Ota, in quartiers vegls da cumüns, illa Biblioteca engiadinaisa ed aint il museum da fotografia Flury. Qusitas spüertas vegnan organisedas in stretta collavuraziun culla Cumischiun bilinguited, il Museum alpin ed otras instituziuns.

La triennale da sted prasta üna contribuziun importanta per la visibilited da la cultura da Puntraschigna

Ils artists e las artistas da la triennale da sted prastan üna contribuziun importanta per la visibilited da l’istorgia e la cultura da la vschinauncha. In collavuraziun cun „experts da cultura indigens“ e cun retscherchas a reguard cultura in nossa regiun as sviluppan interpretaziuns artisticas, chi vegnan mussedas in differents lös in cumün, quasi scu animaziun per üna identited in nossa vschinauncha. Tres la debatta cul lö crescha üna qualited supplementara ed ün immaint per la cultura in nossa regiun.