Puntraschigna Cultura
Sela culturela

Per exposiziuns, prelecziuns, referats e sairedas da tema sto a disposiziun la veglia sela cumünela

Per occurrenzas pü pitschnas scu exposiziuns, prelecziuns, referats e sairedas da tema sto a disposiziun per Puntraschigna cultura la veglia sela cumünela illa chesa da scoula veglia (dasper il Cinema Rex), la Sela culturela. Tar la spüerta illa Sela culturela tuochan occurrenzas istoricas localas scu Gian Marchet Colani, prümas muntedas illa regiun dal Bernina, „giasts cuntschaints“ scu Conrad Wilhelm Röntgen, Richard Strauss, „noss chantunais“ dal Puschlev e da la Bergiaglia, temas da la natüra scu uors, girun, serps, capricorn, aivla, luf tscharvèr, püf grand, fluors in Engiadina, temas actuels scu 100 ans Viafier dal Bernina ubain sport d’inviern, diminuziun dals vadrets, archeologia, ma eir prelecziuns cun Göri Klainguti, Leta Semadeni, preschantaziun dad artists scu Chritian Schocher, Constant Könz, Urs Frey, Lorenzo Polin e Giuliano Pedretti scu eir sairedas d‘art pitschna cun teater, cabaret, musica populera e lirica e l’exposiziun art e misteraunza. 

Otras occurrenzas haun lö in lös adattos in cumün ed illa cuntredgia. Art contemporauna lung la Via Maistra, art da naiv giò Cuntschett, vernissaschas davaunt il Center da cultura e congress, referats culinarics aint il Hotel Saratz, Hotel Kronenhof, Chalet Sanssouci, Valtellina, Pöstli, Gianottis, cuors culinarics aint illa cuschina da scoula u aint il god, dis mundiels da film aint il Cinéma Rex, art pitschna in veglias chesas engiadinaisas, prelecziuns aint il Hotel Walther, concerts dasper il chöntschet da Giandains e la festa da maruns bainvisa aint illa chascharia da Morteratsch. 

Per occurrenzas pü grandas da Puntraschigna cultura, suvenz in collavuraziun cun Puntraschigna turissem, es la sela da kino u la sela Arabella aint il Center da cultura e congress il lö d’arranschamaint. Musicals, grandas producziuns da teater, concerts per iffaunts Rambazamba, lavuratoris d’art, concerts, cumedgia e la Saireda culturela haun lö aint illas selas pü grandas.