Puntraschigna cultura acquirescha finanzas supplementaras, per cha spüertas per iffaunts e giuvenils u per classas da scoula possan gnir offertas gratuitamaing u per entredas redottas. Per la granda part dals referats da ram e per prelecziuns haun ils iffaunts e las scolaras e’ls scolars entreda libra. Giarsuns e students profitan da predschs d’entreda bass. L’intermediaziun da valuors culturelas ad iffaunts e giuvenils d’eira da cumanzamaint davent ün giavüsch important da Puntraschigna cultura. Chanzuns rumauntschas al concert d’iffaunts Rambazamba, exposiziun d’art dad iffaunts per iffaunts, musicals d’iffaunts scu il „Dschungelbuch“, „Pippi Langstrumpf“, il palc da las parevlas, lavuratoris creativs e bger oter pü vegnan spüerts pels iffaunts pü giuvens.
L’intermediaziun da valuors culturelas ad iffaunts e giuvenils es ün giavüsch important da Puntraschigna cultura
A scolars vain pussibilito la visita da teaters e producziuns musicalas professiunelas, scu per exaimpel la flöta magica, producziuns da teater scu Krabat, „Supergute Tage“ u „Tintenherz“, lavuratoris da sculpturas da naiv cun teams professiunels ed internaziunels, prelecziuns per classas cun Marcella Maier, lavuratoris cun artists da l’exposiziun scu Corina Bezzola e Guido Baselgia u la visita dals dis da film mundiels.
