Raig da l’art da naiv

Il materiel naiv drouva experienza ed indschegn e cuntegna minchataunt surpraisas. Artists da naiv pateschan darer fraid düraunt lur lavur, causa ch’ella es sfadiusa. Sculptuors da naiv scu Philipp Käppeli sun excellents misterauns, ma in prüma lingia artists. L’artist e sculptur Philipp Käppeli appartegna cun sias duos victorias tar la concurrenza internaziunela per art da naiv, Snowart Puntraschigna, globelmaing tar la prüma liga dals artists da naiv. "Daspö il 1997 partecipesch eau adüna darcho a differentas concurrenzas d’art da naiv. La debatta cul materiel es fascinanta, cun sia pürited e sieu caracter compact as sviluppa l’impreschiun da marmel pür. La naiv am do la pussibilited, da lavurer in otras dimenisuns da grandezza."

Philipp Käppeli
Art da naiv perfetta es scu üna sculptura da marmel


Il sculptur, 47 ans vegl e creschieu sü a Reinach, es ün dals meglders artists da naiv dal muond. Cun sia precisiun artistica e manuela metta el adüna darcho nouvas imsüras tar la triennale d’art da naiv „Snowart“ a Puntraschigna.

Art da naiv a Puntraschigna nu sun figüras dad uors cherins e stambuochs imposants

Cu pochs oters inclegia el, da collier cun sieu team l’art da naiv tradiziunela cun möds da declaraziuns da l’art contemporauna e da contribuir uschè ad üna mira qualitativa ed innovativa. Sülla dumanda, scha art da naiv nu saja invauna, scha ünguotta nu resta inavous da prümavaira cu ün pêr algordanzas, managia el: "Art es, da der ün’expressiun ad ün’ideja – e chi chi ho fingià üna vouta creo üna sculptura, da l’ideja fin tar l’ultima politura, quel so, cha que sun algordanzas fermas e restantas. Art da naiv as sviluppa aint il cho – cun tuot il corp – aint il team. Mincha decisiun, mincha fuorma arduonda, tuot resta picho aint illa memüergia. Cò nu giouva que üngüna rolla, scha l’ouvra visibla sdregla da prümavaira."

A sun adüna ils pitschens, per part simpels gests chi m‘interessan e‘m tuochan.

Art da naiv as sviluppa aint il cho – cun tuot il corp – aint il team

Già i’ls ans 90 d’eira Puntraschigna, dasper San Murezzan, lö d’acziun da la concurrenza internaziunela da sculpturas da naiv. La prüma Via d’art es naschida dal 2006 a la riva dal Flaz, dasper la loipa dal cuntschaint maraton engiadinais. La concurrenza incumparabla sün tuot il muond, chi drouva il materiel naiv scu expressiun da la sculptura contemporauna, s’ho s-chaffida ün renom internaziunel. Bgers artists da naiv vöglian parteciper a Snowart e la concurrenza es granda: Teams da la Svezia, Finlanda, dal Canada, dals Stedis Unieus, da l’Ollanda, l’Italia, da la Rumenia, Germania, da l’Austria e da la Svizras as haun fingià partecipos. Els haun s-chaffieu lung la loipa da not da Tolais ün sömmi our da naiv e glüsch. Ils ogets haun regalo als passants invistas e perspectivas tuottafat inaspettedas; düraunt il di e specielmaing impreschiunant - da not. A sun creschidas ouvras dad expressiuns fermas, chi haun chatto inavous illa circulaziun da la natüra da prümavaira.

Intaunt haun gieu lö quatter concurrenzas d’art da naiv a Puntraschigna cun partecipaziun dal team da Philipp Käppeli. 

  • 2006: UP! 1. premi da la giuria da ram
  • 2009: VITA diplom da la giuria da ram
  • 2012:  BETWEEN LINES 1. premi da la giuria da ram e premi dal public
  • 2015: SPIRAL OF LIFE 2. premi da la giuria da ram e premi dal public

Sias lavuors, ch’el realisescha insembel cun Mike Imhof, André Sigrist, Peter Müller, Marco Ercolani e Manuel Specht, sun gnidas valütedas tenor criteris scu realisaziun innovativa dal tema, la valur da la contribuziun per la sculptura contemporauna, il carisma artistic, proporziunalited ed armonia da la sculptura, la realisaziun misterauna, inscenaziun ed effet da glüsch e realisaziun tecnica.

Eir da sted s’occupa Philipp Käppeli cun l‘art: „In mias creaziuns tscherchi l’essenza da mia percepziun, chi’s manifesta in üna lingua da purtret redotta. In mias lavuors sculpturelas sun que suvenz ogets chattos tschernieus, chi’m servan scu funtauna d’inspiraziun e ch’eau svilup inavaunt formelmaing. Lascher ster stizis e furmer nouvs stizis aint il materiel, percipir il spazi e’l resguarder consciaintamaing scu part da l’ouvra, sun parts elemanteras aint il process da lavur.  Que chi descriva mieu möd da lavurer sun dapü la fuorma cu la culur, dapü la reducziun cu l’opulenza, dapü la forza illa quietezza cu’l dad ot e dapü l’abstracziun cu’l concret." www.philippkaeppeli.com